Amit Shah-an Assam-ah LS campaign ṭan Ram dang mi umchhuah tiam

Bharatiya Janata Party (BJP) President Amit Shah chuan Ningani khan Assam-a Lok Sabha inthlan awm tur atan campaign a ṭan a, ramri himna leh ram dang mi rawn lut tihtawpte chu a au hlaah a hmang.

Nagaon district-a Kaliabor-a rally neihnaa thu a sawinaah Amit Shah chuan, "Assam-ah ram dang mi lo lut ṭhin kan titawp tawh. Pime Minister Narendra Modi hi thunei tura vote tlin leh a nih chuan, ram dang mi rawn lutte chu kan zawngchhuak vek ang a, an vaiin kan thawnlet ang", a ti.

Shah chuan Assam Accord 1985 chu Congress hunlaia ziah a ni tih sawiin, mahse Congress chuan a kalpuina turin engmah an ti leh si lo tih a sawi. Anni chuan Assam Accord clause 6 chu an kalpui vat dawn tih sawiin hemi hmang hian Assam mipuite chuan constitutional, legislative leh administrative venhimna an dawn theih dawn bakah, Assam culture, ṭawng leh tihdan phungte chu humhim a ni thei dawn tih a sawi bawk.

Assam Accord hi kumin kumtir khan kalpui tum niin Home Ministry chuan mi pakua awmna commitee a din a, mahse Citizenship Amendment Bill, 2016 boruak vang khan committee member-te hi an inhnukdawk leh a ni.

BJP President hian an thawh­pui Asom Gana Parishad (AGP) candidate Mani Madhav Mahanta tana campaign nghalin Congress chuan Badaruddin Ajmal kaihhruai All India United Democratic Front (AIUDF) an thawhpui a, Chief Minister hlui Tarun Gogoi-a fapa chu tihtlin ngei an tum tih a sawi. Mahanta leh Congress MP Gaurav Gogoi-te chuan Kaliabar Lok Sabha seat an inchuh dawn a ni.

Samak thah a nih ṭhin chung­chang pawh sawilangin hemi chungchangah hian Congress sorkar chu a bei zui a, BJP sorkar chuan heng thil dik lo titute hi an manin a ruka sa pel a ni ṭhin chu an ngai thutak hle tih a sawi.

Tunah chuan Assam-ah chuan samak thahna a thleng tawh ngai lo tih sawiin, Kaziranga National Park-chu ram dang mi dan loa rawn lut ten an luah ṭhin a, mahse Congress chuan an hnawtchhuak ngai lo a ni, a ti bawk. Congress chuan vote duh vangin chung ram dang mite chu an venghim zawk nia puhin, BJP sorkar chuan an hnawtchhauk ta tih a sawi a ni. An sorkar chuan Vashnavite monastery ram acre 200 zet chu an thianfai thei tih sawiin, tunhma chuan dan loa ramchhunga awm ten an luah ṭhin tih a sawi.

Congress sorkar chu beih chhunzawm zelin Manmohan Singh-Sonia Gandhi-te kaih­hruaina hnuaiah Pakistan chuan an sipai-te that mah se sorkar chu an ngawi tlat ṭhin a, mahse anni chuan Balakot an bei nghal tih a sawi.

Ram chak tak tak US leh Israel-te chu an thawhpui tih sawi­in, armed force hmanga phuba lak dan chu an hria tih a sawi. BJP President chuan BJP leh a thawhpuite chuan Assam-a Lok Seat seat awm zawng zawng chu an la vek dawn tih a sawi a ni. Assam hian LS inthlan hi thawh thumin an kalpui dawn a, April 11, April 18 leh April 23-ah te an inthlang ang.