Hmarchhak state tinah hri kai pung chak

Ram pumah Covid-19 hri leng thawh hnihna a thleng mek a, hmarchhak state hrang hrangah pawh hri kai thar an pung chak hle.

Kar liamta Inrinni khan Assam-ah hri kai thar 2,236 awmin, mi 14 in an thihpui bawk. Assam-ah hian hri kai hmuh chhuah hi mi 2,35,689 an tling tawh a, an zinga 1,186 in an thipui tawh a ni. Hri kai enkawl mek, active case hi 14,198 an awm.

Arunachal Pradesh-ah Inrinni khan hri kai thar 116 an awm a, hri kai hmuh chhuah 17,546 awm tawhin, active case 550 an awm a, hri vangin mi 56 an thi tawh bawk. Kar liam ta Zirtawpni khan state cabinet chuan kum 18-44 inkar hnena a thlawna Covishield vaccine sem tur leina atan Rs vbc 65 dah a rel a, he sum hi Health department budget aiin a tam zawk a ni.

Manipur-ah hri kai thar 129 awmin hei hi ni khata hri kai thar tam ber ni a ni. Inrinni vek khan Covid-19 vangin mi pahnih an thih belh bawk a, an state-a hripui vanga thi hi mi 383 an tling tawh. Hri kai hmuh tawh 30,281 awmin, active case hi 705 an awm mek.

Meghalaya-ah pawh Inrinni khan Covid-19 kai mi 155 hmuh chhuah leh a ni a, an state-a hri kai hmuh tawh hi 15,786 an tling tawh a, active case 1,244 an awm mek. Hripui vanga thi hi 158 an awm tawh bawk.

Nagaland-ah hri kai thar 114 an awm belh bawk a, an state-a Covid-19 kai hmuh chhuah hi 13,003 ni tawhin, mi 98 in an thihpui tawh a ni. Hri kai enkawl lai, active case hi 555 an awm mek.

Sikkim-ah Inrinni khan mi 121 in hri an kai tih hmuhchhuah a ni a, ni khata hri kai tam ber ni a ni. Active case March thla tawp lam khan 47-a a tlakhniam tawh hnuah, nimin khan hri kai enkawl mek hi 798 an awm tawh. Hripui thihpui hi mi 137 an awm tawh bawk.

Tripura-ah chuan Covid-19 kai hmuh chhuah hi 34,429 an tling tawh a, Inrinni khan kai thar 127 an awm. Active case hi 518 an awm mek a, Covid-19 vanga thi mi 391 an awm tawh bawk a ni.