Meghalaya minister-ten an thla thum hlawh 10% hri dona atan pe

Meghalaya-a minister zawng zawng chuan state sorkarin Covid-19 hri leng dona atana a hmalakna puihna turin an thla thum hlawh aṭangin 10% chu CM Relief Fund for Covid-19 ah an chhung lut tih chief minister Conrad K Sangma chuan a sawi.

CM chuan hemi chungchang hi a twitter-ah tarlangin, minister-te chungah lawmthu pawh a sawi nghal a, CM Relief Fund for Covid-19 atana January-March thla hlawh aṭanga 10% an pek hi Rs 3,53,250 a ni tih a sawi bawk.

Zirtawpni liam ta khan CM hian district 11-a deputy commissioner-te chu virtual meeting a neihpui a, hri leng hluar leh mek chungchanga hma lak dan turte an sawiho.

Hri kai an pun leh avangin Meghalaya sorkar chuan tun thla chhung atan eichawp dawr ni lo, dawr dangte chu a lo khar tir vek tawh a; school, college leh university-te pawh May 4 thleng atan khar niin, sorkar leh private office pawh thawktu 30% chin zel kal tura tih an ni.