Tripura-in kum 18 chin vaccine pek hun titlai dawn

Tripura sorkar chuan May 1 aṭanga kum 18 chin hnena Covid-19 vaccine pek tura tih chu vaccine siamtu lam aṭangin an thawn theih hun tur an la tichian loh avangin tihkhawtlai a ngai dawn niin National Health Mission (NHM) Director Dr Siddharth Shiv Jaiswal chuan a sawi.

Dr Siddarth Shiv Jaiswal chuan sorkar laipui ruahman anga May 1 aṭanga kum 18 chin vaccine pek tumin state sorkar pawh a lo inbuatsaih a, mahse vaccine siamtu lamin an pek theih hun tur hi an la tichiang thei lo a ni, a ti.

"Vaccine siamtu lam pawh kan bepawp reng a, mahse an supply theih hun tur an la tifel thei lo. Hri leng vanga harsatna nasa tak tawk mek, Maharashtra lamah pek hmasak an tum tih an sawi a ni," tiin Dr Jaiswal chuan a sawi.

Vaccine rules siam tharah, state leh private company-te chuan sorkar laipui kaltlang loin vaccine siamtute hnen aṭang hian an lei thei dawn a ni.