Assam sorkarin private hospital-te pui dawn
Assam sorkar chuan state chhunga private hospital leh nursing home hrang hrangte chu oxygen unit an siamnaah a pui dawn tih health and family welfare minister Himanta Biswa Sarma chuan a sawi.
State sorkar hian Covid-19 hri len hnuah sorkar hospital panga-ah oxygen plant pariat a siam tawh a, heng aṭang hian ni khatah oxygen metric ton 5.25 zel siamchhuah a ni.
Gauhati Medical College Hospital-ah unit pathum siamin, ni khatah MT 2.13 siam chhuah a ni a, Jorhat Medical College Hospital-a unit pahnih aṭangin MT 1.24, Texpur, Brapet leh Diphu Medical College-ah unit pakhat ṭheuh awmin, nitin MT 0.62 siamchhuah ṭheuh a ni bawk. Unit dang panga siam turin hma lak mek a ni tih Sarma chuan a sawi bawk.
Health Minister hian private hospital leh nursing home neitute chu kar liamta Inrinni zan khan meeting a lo neihpui tawh a, an hospital/home-ah ṭheuh oxygen unit siam tura ngenin, hemi kawngah hian sorkar chuan a theih angin a pui zel dawn tih a hrilh.
Bhutan aṭangin oxygen lakluh tum
Minister Sarma chuan ram chhunga hri kai an pun chak leh avanga damdawi-in hrang hrangten oxygen indaih lohna an tawh mek karah, an state-in harsatna an tawh ve lohna turin Bhutan ram aṭangin oxygen lakluh an tum tih a sawi.
Sarma chuan hri kaite enkawlna damdawi, Remdesivir chu a siamtu Sun Pharma hnenah Guwahati bula Palabsbri plant aṭaning ni tin vial 80,000 siam chhuak tura a ngen thu leh, damdawi lam indaih lohna hi a awm loh tur thu a sawi. Pathianni khan Palasbari plant hi a tlawh nghal a ni.
Oxygen lamah pawh harsatna an tawh lohna turin inbiakna an neih thu leh, Memorandum of Understanding (MoU) pawh an ziah thuai tur thu a sawi.
Hri kaite enkawlna tur ICU khum pawh siam belh a ni tih sawiin, hri leng mek chu nikum lam ang bawkin rang taka an thunun theih a rin thu Minister chuan a sawi. State sorkarin kawng hrang hranga hma a lak chhoh mek avangin lockdown puan pawh a ngai hrih dawn lo a ni, a ti.