Sikkim-ah May 31 thleng school leh college khar

Sikkim sorkar chuan an state-a Covid-19 hri kai an pun belh zel avangin May 31 thleng zirna in hrang hrang a khar.

Education Depart­ment chuan thuchhuah siamin, school leh college zawng zawng chu May 31 thleng khar a nih thu a sawi. Pathianni khan Sikkim-a hri kai thar mi 148 an awm a, hri kai hmuh tawh hi mi 7,306 tling tawhin active case 934 an awm mek. Hripui vanga thi mi 138 an awm tawh bawk.

Gangtok-a Central Referral Hospital (CRH), Manipur Hospital tih bawk chu Covid-19 hri kaite enkawlna hmun atana hman a ni dawn a, hri kai enkawlna turin khum 100 ruahman a nih thu thuneituten an sawi.

Hospital Medical Su­pe­r­intendent Dr Yogesh Verma chuan an state chhungah, a bikin East District-ah hri kai an pun chak avangin damdawi-in pawh hi hri kai enkawlna tura tih tel a ni tih a sawi. "Nikumah khan CRH bik chu non-Covid enkawlna atana tih a ni. Mahse kumin chuan hri kai an pun chak tak em avangin thutlukna lo siam tawh hi thlak a ni. Building chhawng 8 leh 9-na chu Covid section atan siam a ni dawn a, hetah hian ICU pawh a awm nghal vek a ni," a ti. A tirah hri kai enkawlna tur khum 50 chu siam phawt a ni dawn a, boruak awmdan a zirin khum hi siam belh zel a ni dawn tih a sawi.

AP-ah zirna in khar
Aruanchal Pradesh sorkar chuan nimin aṭang khan an state chhunga school leh hostel-te a khar. April 26 hnu lama test leh exam neih tur pawh ṭhulh vek a ni.

State sorkar chu hri lengin zual lam a pan zel avangin zirna inte hi May 31 thleng khar a ni tih a sawi. Hemi chhun hian zirtirtute erawh chu internal work ti turin a ṭul dan azirin school kal tura tih an ni thung.