Manipur-ah hmeichhiate pualin Covid-19 Care Centre siam
Manipur chief minister N Biren Singh chuan Thawhṭanni khan Imphal-a Khuman Lampak Sports Complex-a Indoor Hall-a Covid-19 Care Centre siam chu a tlawh a, he centre hi hmeichhiate pual bik atan siam a ni tih a sawi.
He centre-ah hian khum 250 a awm a, nikum October thla khan hri leng avangin CCC atan hman a lo ni tawh a, hri kai an tlem chhoh hnuah December thla khan khar a ni. CM chuan Khuman Lampak-a Youth Hostel-ah mipa pualin CCC hi siam a ni dawn tih a sawi bawk.
Singh hian Regional Institute of Medical Sciences (RIMS) leh Jawaharlal Nehru of Medical Sciences (JNIMS)-a medical oxygen plant-te a tlawh nghal bawk. RIMS-a oxygen plant hi hman ṭan niin, hospital-a Covid-19 unit leh ward-a medical oxygen mamawh pawh a supply tawh tih CM chuan a sawi.
JNIMS-a PSA oxygen manufacturing plant-ah hian ni khatah D-type cylinder 50 tan oxygen siamchhuah theih tura tih a ni a, vawiin aṭangin hman ṭan a ni ang.
Chief Minister chuan hri leng thawh hnihna thleng mek atan theihtawpin an inbuatsaih tih a sawi a, an state-in medical oxygen an ngah tawk tih a sawi. Hemi rual hian mipuite chu hri darh tur venna atana kaihhruaina siamte zawm ṭha a, fimkhur zual zel turin a chah nghal a ni.
Ni khata hri vanga thi tam ber ni thleng
Manipur-ah hian Thawhṭanni khan Covid-19 hri kai mi panga an thi a, hei hi hri leng thawh hnihna a thlen hnua hripui vanga ni khata thi an tam ber ṭum a ni.
Thawhṭanni khan hri kai thar mi 146 an awm belh leh bawk a, an state-a hri kai hmuh chhuah tawh hi 30,567 an tling tawh. Hri kai mek, active case hi 910 an awm bawk.