Assam-ah vaccine pek hun tikhawtlai maithei

Assam health minister Himanta Biswa Sarma chuan May 1 aṭanga Covid-19 vaccine pek thawh hnuhnung ber kalpui tur chu kar khat vela an tihkhawtlai a ngai maithei niin a sawi. Assam-ah hian tun hnaiah hri kai an pung leh nasa hle a, hetih lai hian Thawhṭanni zan dar 6 thlenga sorkar website-a a landanin, vaccine dose la kim tawh hi mi 4,36,143 chauh an la ni.

Guwahati-a chan­chinbu mite a kawmaah, Sarma chuan Bharat Biotech leh Serum Institute-ah vaccine hi an order tawh tih a sawi a, "Anni hian vaccine min pek theih hun hunah, vaccine pek chhuah hna hi kan kalpui thei chauh ang," a ti. Vaccine siamtu lam hian an supply theih hun tur an la tichiang thei lo a, hei vang hian May thla tir aṭang chuan vaccine hi pekchhuah theih a rinawm lo tih a sawi.

Sarma chuan below poverty line chhungkua leh thla khata Rs 10,000 la lut pha lo chhungkuate damlote puihna tura scheme siam, Aroyga Nidhi aṭangin vaccine leina tur sum hi hman a ni dawn tih a sawi bawk. A bak a daih lohna chu state budget aṭanga pawh hek a ni ang. Assam sorkar hian kum 18-45 inkar vaccine pek tur a thlawn vekin a pe dawn tih a lo sawi tawh a ni.

Industry hnena oxygen pek titawp rih
Assam industries and commerce minister Chandra Mohan Patowary chuan Assam-ah oxygen lamah harsatna a la awm lo tih a sawi a, hetichung hian inralrinna atan state sorkar chuan industry ho hnenah oxygen supply chu a tihtawp rih thu a sawi.

State chhunga oxygen plant hrang hrang neitute kawmin, Patowary chuan emergency thlen palh thulh atan inbuatsaih a, oxygen an siamchhuah pawh titam turin a ngen. Oxygen plant aṭanga oxygen siamchhuah zawng zawng chu hospital hrang hrangah pek a ni ang.

Minister chuan oxygen siamtute hnenah hlawkna lam ngaihtuah rih lo tura ngenin, mipuite tana theihtawpa rawngbawl a ngaih thu a sawi a, sorkar pawhin a theihtawpin a pui zel dawn tih a hrilh bawk. Assam-ah hian oxy­gen manufacturing unit paruk a awm mek a, ni khatah oxygen hi metric ton 61 an siamchhuak thei a ni.