AP Assembly-in COVID-19 control room siam leh

Arunachal Pradesh Legislative Assembly (APLA) chuan hri leng avanga state danga tangkhangte puihna turin assembly secretariat-a Covid-19 Control Room an siam thar leh.

Thawhṭannia Lok Sabha speaker Om Birla leh state hrang hrang assembly-a presiding officer zawng zawng virtual meeting an neihah, Speaker hian state danga inhlawhfa leh zirlai tangkhangte ṭanpui dan tur ngaihtuah a, state assembly-a control room siam leh hi a rawt a ni.

Arunachal legislative assembly speaker PD Sona chuan he rawtna angin Control Room hi tihnun leh nghal a ni tih a sawi a, nikuma hrileng vanga ram puma lockdown puan a nih lai khan Control Room hi an state mi leh sa, hmun danga tangkhangte puihna kawngah a ṭangkai hle a ni, a ti.

Control Room-a duty turin ṭhalai eng emaw zat an inpe nghal a, Sona chuan heng mite chungah hian lawmthu sawiin, midang ṭanpui tura theihtawp chhuah zel turin a fuih. Speaker chuan India ram pumah hri leng a hluar chhoh leh avanign eng ang dinhmun pawh tawng thei tura an lo inpeih a ṭul thu a sawi.