Oxygen lamah harsatna kan tawk lo ang :AP CM

Arunachal Pradesh chief minister Pema Khandu chuan an state-in medical oxygen an ngah tawk a, Covid-19 hri kai enkawlna kawngah harsatna an tawk lo ang tih a sawi.

State chhunga hri leng mek dinhmun leh hri darh tur venna atana an inbuatsaih dante thlirin CM hian state BJP member-te virtual meeting a neihpui a ni. CM chuan state chhung hmun hrang hrangah oxygen-generating plant pariat a awm thu a sawi bawk.

Hri leng thawh khatna thlen khan a kaihhruai sorkar chuan health infrastructure tihchakna turin theihtawpa hma a lak thu leh, hri leng thawh hnihna thleng mek do let tura an inpeih ṭhat thu Khandu chuan a sawi a ni.

Khandu hian hri leng chungchang state dinhmunte sawipuiin, MLA, municipal corporator leh councillor, panchayat leader leh district hotu hrang hrangte chu virtual meeting a lo neihpui tawh bawk a, heng hunah hian hri darh zel tur venna atan hma lak dan turte an sawiho bawk.

Hri leng hluar chho leh mek avangin mipuite chu pawn chhuak lo turin CM chuan a ngen. Hri laka an himna turin a ṭul tawp a nih loh chuan in chhuahsan lo tura ngenin, pawn chhuahnaah face mask vuah ṭha a, midang nena inhlata awm tur leh, kut sil ngun turin a chah a ni.