Manipur CM hmu tur tan Covid-19 negative report neih ngai

Manipur chief minister N Biren Singh hmu turte tan an hmuh hma darkar 72 chhunga Covid-19 negative test report an neih zel a ngai dawn.

Hri leng karah Chief Minister office hian tluang taka a hna thawh chhunzawm zel theihna turin he ruahmanna hi siam a ni tih official-te chuan an sawi. Hei hi an state-a hri leng thawh hnihna a thlen hnua chief minister office complex bik tana kaihhruaina siam hmasak ber a ni.

CMO chuan he kaihhruaina siam hian minister, MLA leh bureaucrat-te pawh a huam tel vek tih a tarlang bawk.

Hei bakah hian CM hmuh tumte tan state sorkar leh sorkar laipui kaihhruaina siam angin Covid-19 vaccine an lak a ngai bawk. CM hmu tura appointment an siam hmain CM office lamin vaccine an la tih finfiahna certificate hi a dil dawn a ni. Pawl anga a huhoa CM hmuh tumte tan pawh bithliah siamin, ṭum khatah mi pathum aia tam an tel phalsak an ni lo.

Office lamin CM hmu tura appointment a pekte chu CM hnenah thilpek engmah pe lo tura hriattir an ni bawk.