Meghalaya-ah Covid-19 vanga thi ruang inah hawn phalsak

Meghalaya sorkar chuan an state-a Covid-19 hri vanga thite ruang chu an chhungten in lamah an hawn a phalsak. Mahse ruang hi in chhungah dah loin, kawtah dah tura tih a ni a, darkar 48 ral hmain phum emaw, hal emaw nghal tur a ni bawk.

State sorkar hian a hmain Covid-19 vanga thi ruang hi in lamah lak a remti lo a, sorkar lam thuneituten ruang phum leh hal hi an buaipui mai ṭhin a ni. Mahse mitthi ruang hi in lama lak a phalsak ta a ni.

Health minister AL Hek chuan ruangte chu tuam ṭhat a, kuanga ṭha taka khung an nih chuan in lama hawn pawhin hlauhthawn tur a awm lo tih a sawi.

May 1-ah kum 18 chin vaccine la pe thei dawn lo
Sorkar laipui ruahman anga May 1 aṭanga kum 18-44 inkarte hnenah Covid-19 vaccine pek runpui kalpui tur chu Meghalaya chuan a hun ruatah an ṭan ve thei dawn lo tih an sawi.

Meghalaya sorkar hian Covishield vaccine siamtu, Serum Institute of India hnen aṭangin vaccine an order chu an la nghak mek a, a siamtu lam hian an thawn theih hun tur an la tichiang thei lo niin a sawi. Hei vang hian May 1-a vaccine pek chhuah tur hi an tihkhawtlai a ngai a, an pek theih hun tur chu an la inhriattir leh dawn tih an sawi a ni. Hemi rual hian kum 18 chin vaccine la duhte tan online registration chu a tih lawk theih reng thu an sawi bawk.