May 1 aṭangin Shillong-ah zirna in leh private office khar dawn

Meghalaya chief minister Conrad K Sangma chuan hri leng darh zel tur venna atan sorkar chuan khuahkhirhna a siam thar tih sawiin, May 1 aṭangin ni 10 chhung chu Shillong, Jowai leh Tura khawpuiah politics leh sakhaw thila punkhawm a khap.

Heng khawpui pathumah hian zirna in leh private office te pawh khar vek an ni ang. Infiamna lam pawh phal a ni lo.

CM chuan hemi chungchang hi a twitter-ah tarlangin, "Khuahkhirhna siam hi May 1 zing dar 5 aṭanga May 10 thleng hman a ni ang," tiin hei hi hri darh zel tur venna atana ruahman a nih thu a sawi.

Deputy chief minister Prestone Tynsong chuan district thuneitute report hrang hrang an ennawn hnuah sorkar chuan he thutlukna hi a siam tih a sawi bawk. "Lockdown puan a ni dawn lo a, mahse Covid-19 hri leng hluarna hmunah erawh inkhuahkhirhna hi siam a ni zel ang," a ti