Nagaland-ah Covid-19 ICU admission A let 5-in pung

Nagaland health and family welfare department-in a tarlan danin, October thla chhung khan an state-ah Covid-19 hri kai, ICU-ah admit ngai chu a thla hmasa aiin a let ngain an tam. 

State chhunga Covid-19 vanga thi zinga a zahve dawn chu October thla chhunga thi an ni bawk. Nagaland-ah hian hripui thihpui hi mi 33 an awm tawh a, an zinga 15 chu October thla chhunga thi an ni. Thi zinga mi 24 chu Dimapur ami niin, Kohima-ah mi paruk; Mon, Mokokchung leh Wokha-ah mi pakhat ṭheuhin hripui hi an thihpui tawh bawk. 

Covid-19 thihpui tawh zinga 60% chu kum 60 hnuailam an ni a, kum 80-89 leh 70-79 inkar mi panga ve ve, kum 60-69 inkar mi pathum, kum 50-59 mi pali, leh kum 40-49 leh 28-39 inkar mi pasarih ve ve an thi tawh bawk. Thi zinga 73% chu mipa an ni. 

Medical department chuan coronavirus kai hmuh chhuah zinga 4% chu natna langchhuak, symptomatic an ni tih a tarlang. Heng zinga 77% chuan khawsik an nei a ni. 

October thla chhunga hri kai hmuh chhuah, positivity rate hi 15.4% a tling pha a, national average aiin a sang zawk a ni. Health department chuan kum 21-40 inkar bikah positivity rate hi a sang zual hle tih an sawi. 

Dimapur khawpuia non-essential motor tan bika odd-even scheme hman pawh November 30 thleng hman chhunzawm a ni dawn. 

Dimapur commissioner of police Rothihu Tetseo chuan Covid-19 leng vanga traffic regulation siam chung­changa thupek hi Pathianni khan a tichhuak a, motor number kawpkim leh kawpkim lote chu intlanchhawk tir chhunzawm an ni dawn tih a sawi. Thawhṭanni, Nilaini leh Zirtawpniah number kawpkim lo an tlanchhuak thei a, Thawhlehni, Ningani leh Inrinniah number kawpkim chauh tlanchhuah phal a ni thung. Two-wheeler te erawh chu he scheme hian a huam ve lo.