Assam JEE(Main) scam-a mawh-phurtu man

Assam-a Joint Entrance Exa­mination (Mains)-a dik lo taka thiltihna thlenga mawhphurtu bera puh, Bhargav Deka chu Pathianni zan khan Guwahati-a Lokpriya Gopinath Bordoloi International airport-ah police-ten an man. 

Assam Police headquarters chuan thuchhuah siamin, Bhargav Deka hi Guwahati-a coaching institute Global Edu Light neitu a nih thu an sawi a, exam-naa thil dik lo tihnaa mawhphurtua puh dang Tata Consul­tancy Services (TCS)-a thawk pakhat pawh man tuma zawn mek a ni. He thila inhnamhnawih dang mi pasarih man an ni tawh bawk a, an  zingah hian JEE(Mains) a pakhatna leh a pa bakah examination invigilator pawh an tel. 

September 5-a Assam JEE(Main)-a pakhatna, Neel Nakshatra Das  chuan exam-ah amah ṭhu loin a aiah midang a chhan tir nia sawi a ni. He thil thleng chungchangah hian October 23 khan Mitradev Sharma chuan FIR a thehlut a, topper nu leh pa hi doctor ve ve an nih thu leh, exam-a an fapa pui tur hian private coaching institute hnenah cheng nuai 15-20 vel an pek thu a sawi a ni. 

FIR thehluh a nih hnuah Guwahati Additional Deputy Commissioner (West) Supportive Lal Baruah kaih­hruaiin exam-naa dik lo taka thiltih nia sawi chhui chiang tur special investigation team din nghal a ni.