Manipur-in ICU ventilator 150 dawng

Manipur sorkar chuan union ministry of health and family welfare hnen aṭangin AgVa Intensive Care Unit (ICU) ventilator 150 an dawng. Prime Minister’s Citizen Assistance and Relief in Emergency Situations Fund (PM-CARE Fund) hnuaiah ICU ventilator-te hi pek an ni. Ningani khan Imphal-ah phurh thlen an ni a, chief minister N Biren Singh hoin an lo dawngsawng a ni.

Chief Minister chuan sorkar laipui chungah lawmthu sawiin, a hmaa a lo pek tawh ventilator 90-te chu Imphal-a Jawaharlal Nehru Institute of Medical Sciences (JNIMS) hman mek an ni, a ti.

Sorkar laipui hian oxygen concentrator 400 leh D-Type oxygen cylinder 500 a lo pe tawh bawk tih sawiin, Singh chuan an state-ah D-Type cylinder 3,000 an nei mek tih a sawi.

Covid-19 testing chak zawka kalpui a nih theihna atan UNICEC aṭangin RT-CPR khawl pahnih an dawn tawh thu leh, heng khawl hi JNIMS leh RIMS ah dah an ni tih CM chuan a sawi bawk.

Oxygen supply tam zawk an neih theihna turin ni 10-15 chhungin Thoubal leh Churachandpur district-a oxygen generating plant-te chu hman theih an ni tawh dawn tih Singh chuan a sawi. Manipur hian JNIMS leh RIMS-ah medicine oxygen plant pahnih a nei mek a ni.

Hri darh zel tur venna atan mipuite chu sorkarin kaihhruaina a siamte ṭha taka zawm zel turin CM chuan a ngen, sakhaw thila punkkhawmna pawh huaihawt lo turin a ngen. Fimkhur taka invenna chu hri laka himna hmanraw ṭha ber a ni tih sawiin, kaihhruaina siam bawhchhiate chu manin hremna na tak pek zel an ni dawn tih a sawi. Hemi rual hian Singh chuan state chhunga hri leng dona kawnga hma lak danah mipuiten rawtna ṭha zawk an neih chuan sorkarin lawm takin a lo dawngsawng zel dawn tih a sawi.

CM Singh hian Ningani vek khan hri leng thawh hnihna an tawrh mek hlawhtling taka an do hneh theih dan turah medicial expert, bureaucrat leh police-te kawmin, hma lak dan tur hrang hrangte an sawiho.