Assam Congress-in EVM leh strong room-ah security fel tawk lo niin sawi

Congress party Assam unit chuan assembly inthlan an neih zawh taka vote thlakna atana hman, electronic voting machine (EVM) leh EVM dahna, strong room-ah te security a fel tawk lo nia sawiin, Ningani khan Election Commission-ah complaint an thehlut.

Election Commission-a lehkha an thehluhah, Assam Congress hotu Ripun Bora chuan strong room a him ṭha tawk lo niin a sawi a, hei bakah hian Lakhimpur, Dibrugarh leh Goalpara district-a constituency eng emaw zatah EVM him tawk lo a awm niin a sawi bawk.

Lakhimpur district-a Dhakuakhana biala polling station pahniha ballot unit, control unit leh VVPAT chuan an tag/slip chu Congress mi leh sate strong room pawnah an hmu tih Bora chuan a sawi. Dibrugarh district-a Moran, Lahowal, Dibrugarh leh Chabua biala EVM, control unit, ballot unit leh VVPAT number chu heng biala ding, candidate-te hnena number an pek nen a in ang lo bawk.

State Congress president chuan Goalpara district-ah Nilaini khan mi pathum chu electronic device nen strong room bakah control room chhungah an lut hmuh a ni tih a sawi bawk a ni.

Thil fel tawk loh awmna biala Congress candidate-te chuan an bial returning officer leh district election officer-te hnenah complaint an lo thehlut tawh bawk.

Assam-a assembly seat 126-ah March 27, April 1 leh April 6 khan inthlan hi neih a ni a, vote tlate hi naktukah chhiar a ni ang.