Meghalaya-in Covid-19 vaccine leina atan Rs vbc 120 dil

Meghalaya sorkar hnenah an state-a Covid-19 vaccine pek chhuah thawh thumna, kum 18-44 inkarte hnena vaccine pek tur leina atan cheng vaibelchhe 120 pe turin a ngen.

Health minister Alexander Laloo Hek chuan vaccine thawh thumna pek turah hian vaccine dose nuai 30 vel an mamawh dawn tih a sawi. "Sorkar laipui hnenah vaccine pek runpui kalpuina tur hian sum lama puihna cheng vaibelchhe120 kan dil a, hei hi hri leng thawh hnihna thleng mek dona atan pawh hman tura tih a ni bawk a ni," a ti.

Minister chuan vaccine dose khat hi Rs 400-a bithlaih a nih chuan, kum 18-44 inkar mi nuai 15 vel tan cheng vaibelchhe 120 an mamawh dawn tih a sawi. Hei vang hian sorkar laipui hnenah vaccine leina cheng vaibelchhe 120 pe tur emaw, vaccine siamtute hnenah vaccine hi Rs 150-a lei tir tur emawa ngen turin an hrilh tih a sawi.

India rama hman tura Covid-19 vaccine pawm pahnih zinga pakhat, Covaxin chu a siamtu Bharat Biotech chuan state-te hnenah dose khat Rs 600-a hralh a tum chu Rs 400-ah a tihniam a ni. Hetih lai hian sorkar laipui hnenah dose khat Rs 150-in a pe dawn thung. Serum Institute of India (SII) chuan Covidshield chu state hnenah dose khat Rs 300-in a hralh dawn bawk.