Assam-ah BJP kaihhruai NDA sorkar leh dawn Chief Minister tur tihchian a la ni lo

Assam assembly inthlan neih zawh takah BJP kaihhruai National Democratic Alliance (NDA) chu thlan tlin leh niin, a term hnihna atan an sorkar leh dawn. Assembly seat 126-ah BJP leh a thawhpuite hian seat 75 an la a ni.

BJP hian seat 60 lain party malin sorkarna erawh a siam pha bik lo. An thawhpui Asom Gana Parishad(AGP) chuan seat kua lain, United People's Party Liberal (UPPL) chuan seat ruk an la ve bawk.

Congress kaihhruai eptu ṭangrual pawl, grand alliance chu beisei angin an che ṭha lo. Congress hian inthlan hmasa aiin hma sawn mah se seat 29 chiah a la pha. An thawhpui All India United Democratic Front (AIUDDF) chuan seat 16 an la a, Bodoland People's Front (BPF) chuan seat li chiah a la pha. Grand alliance-a tel zinga mi, CPI(M) chuan seat khat chiah a la bawk. Independent candidate-in seat khat a la bawk a ni.

Chief Minister tur a la chiang lo
Chief minister Sarbananda Sonowal kaihhruaina hnuaiah BJP leh a thawhpuite chuan hnehna chang mah se, sorkar thara Chief Minister tur hi a la chiang lo.

BJP hian inthlan dawnah chief ministerial candidate a siam lo a, hei vang hian CM atan hian tunge dah a ni dawn tih a la hriat loh. BJP vice president leh in-charge Assam, Jay Panda chuan an party parliamentary board-in CM tur hi an la tifel dawn tih a sawi.

Vote nuai khat chuangin Himanta a chak

BJP hruaitu leh sorkar kalchhuaka education, health, finance leh public works department(PWD) minister Himanta Biswa Sarma chu vote nuai khat chuangin a chak.

Sarma hi Jalukbari constituency-ah thlan tlin a ni a, amah hnaih bertu Congress candidate Romen Chand Borthakur nena an vote hmuh zat inthlauhna hi 1,01,911 a tling a ni.

Jail tang lai thlan tlin hmasa ber Akhil Gogoi
Jail-a tang chunga inthlan chuhtu, political party ding thar Raijor Dal hruaitu Akhil Gogoi chu Sibsagar LC-ah thlan tlin a ni a, Assam assembly inthlana jail tang lai MLA atana thlan tlin hmasa ber a ni.

Raijor Dal hi party thar niin, Election Commission of India-ah la register loh a ni a, hei vang hian Gogoi pawh hi independent candidate angin chhiar a ni.

BJP kaihhruai sorkar laipuiin Citizenship Amendment Act (CAA) a siam duh lohna lantira nawrh a huaihawt avangin Gogoi hi kum 2019, December thla khan man a ni a, thubuai rip tak siamsak zui a ni. Gauhati Medical College and Hospital-ah enkawl mek a ni a, heta ṭang hian nomination pawh a thehlut. Bail-a chhuah a dilna chu hnawlsak a nih avangin inthlan dawn pawhin a dinna bialah hian campaign-in a kal ve thei lo.

Hmeichhe MLA ni rei thei ber tling zo lo

Assam-a hmeichhe MLA ni rei thei ber leh sorkar kalchhuak taa cabinet minister, Pramila Rani Brahma chuan Kokrajhar (East) constituency-ah UPPL candidate Lawren Islary a hneh zo lo.

Kum 70 mi, Rani Brahma hi 1991khan he bialah hian independent candidate-in assembly inthlanah a hmasa ber atan thlan tlin a, a hnuah Bodoland People's Front (BPF) candidate-in term nga chhung a zawna thlan a lo ni tawh. Congress kaihhruai sorkarah leh BJP kaihhruai sorkarah cabinet minister a ni ve ve tawh a ni.