Sikkim-ah Covid Care Centre pathum siam belh

Sikkim sorkar chuan an state-a hri kai an pun belh zel avangin Covid-19 Care Centre pathum a siam belh a, hengte hi Pathianni khan chief minister Prem Singh Golay chuan a endik.

Covid Care Centre hi Paljor stadium, Khelgaon leh Sarmasa Garden-ah siam a ni. Paljor stadium-ah hian gynmasium hall-ah siam niin, Khelgaon-a sports department building chhawng thumnaah khum 30 awmna siam a ni a, Sarmasa Garden-ah hmeichhia bik pualin centre hi siam a ni bawk.

CM chuan mipuite chu chiai lo tura chahin, hri kai zinga taksa lama harsatna nei lote chu damdawi-ina lut loa in lamah inkhunghrang turin a chah. Ina inkhunghrangte pawh doctor-ten an dinhmunte an enfiah sak reng tur thu a sawi a ni.

Sikkim-ah hian lockdown puan a ni lo a, mahse sorkar office-te erawh chu May 7 thleng khar tura tih an ni thung. CM chuan nikuma hri leng vanga lockdown puan a nih khan mi tam takin eizawnna kawngah harsatna tawkin, sum tam tak an hloh a, hei vang hian lockdown puan an tum lo tih a sawi a, hemi rual hian mipuite chu hri leng laka inveng fimkhur a, face mask-te vuah ṭha turin a chah.

Hri kaite enkawlna tur damdawi, oxygen leh thawktu pawh an indaih tawk tih CM chuan a sawi bawk.

Manipur-a mipa puala CCC siam hawng
Manipur chief minister N Biren Singh chuan Pathianni khan Bhal Bhawan complex, Imphal-a Covid-19 hri kai mipa awmna tur bika siam Covid Care Centre a hawng.

CCC siam tharah hian khum 235 a awm a, centre hawn ni hian hri kai mipa 17 chu dah luh nghal an ni. He hmunah hian nikum khan CCC hi siam a lo ni tawh a, mahse state chhunga hri lengin ziaawm lam a pan hnuah nikum December thla khan an khar a ni.

Sate health deparmtent chuan Hall of National Sports University (NSU) office complex-ah hmeiche pual bikin khum 2002 awmna centre pawh siam a ni a, hei hi hawn a ni ve thuai dawn tih an sawi.