Sikkim-ah May 6 aṭangin lockdown puang dawn

Sikkim sorkar chuan an state chhunga hri kai an pun belh zel avangin May 6 aṭangin ni 10 chhung chu state pumah lockdown a puang dawn.

State home depart­ment chuan hemi chungchangah hian thu­chhuah siamin, "State chhunga Covid-19 positivity rate hi ni 10 chhung 20% chung lam zel a ni a, hei vang hian hri darh zel tur venna atan khuahkhirhna khauh tak siam hi a ṭul ta a ni," a ti.

Lockdown puan chhung hian state border - Rangpo, Melli, Reshi, Ramman, NTPC (West Sikkim) kaltlanga mimal, khualzin phur motor, sorkar motor pawh huamin luh khap vek a ni ang. Mahse sipai leh security force motor, nitin mamawh phur motor leh medical emergency-te erawh a huam dawn lo thung a ni.

Bungraw phur motor-te a driver chauh check­point a kaltlang phal a ni a, an motor pawh hi zan riah phalsak an ni lo ang.

State chhunga district hrang hrangah lockdown puan chhung hian private leh sorkar motor hmanga inkalpawh khap a ni bawk.

Sorkar office leh PSU-te pawh May 16 thleng khar vek an ni dawn a, emergency duty tih loh chu sorkar motor pawh tlanchhuah phal a ni lo ang. Mahse lockdown chhung hian kum 18 chin hnena Covid-19 vaccine pek chhuah hna chu a tahtawla kalpui tum a ni ang.