Union minister hoin Assam sorkar thar siam dan buaipui dawn

Union agriculture minister Narendra Singh Tomar chu nimin khan Assam-ah zinin, state chhunga party hotute nen sorkar thar siam dan tur an buaipui dawn.

Thawhṭanni khan BJP national vice president leh Assam in-charge Baijayant Pay Panda chuan chief minister Sarbananda Sonowal leh finance minister Himanta Biswa Sarma-te a lo kawm tawh bawk.

Assam assembly inthlanah hian BJP leh a thawhpuite chu hneh taka thlan tlin leh an ni a, mahse sorkar thar siam turah hian chief minister tur hi tihchian a la ni lo. BJP chuan an party parliamentary board-in a rel fel dawn niin an sawi.

Hetih lai hian an party MLA zingah CM atana Sarbananda Sonowal leh Himanta Biswa Sarma duhtute zingah inhruipawhna a awm deuh nia sawi a ni. Hei vang hian CM bakah a ṭum khatna atan deputy chief miniser post pawh siam a nih mai ring an awm a ni. Thawhṭanni pawh khan Sonowal leh Sarma-te hian anmahni duhsaktu MLA-te chu a hranin meeting an neihpui ve ve nia sawi a ni.