Assam-ah khuahkhirhna thar siam : Zan dar 6 aṭangin curfew puan a ni

Assam sorkar chuan an state-a Covid-19 hri a darh zel avangin khuah­khirhna a siam thar leh.

Assam State Disaster Manage­ment Authority (ASDMA)-in thupek thar a tihchhuahah, dawr leh office-te chu tlai dar 2-ah inkhar vek tura tih an ni a, zan lam curfew zan dar 8 aṭanga hman ṭan pawh tihmain, zan dar 6 aṭanga a tuk zing dar 5 thleng curfew hi puan a ni.

Khuahkhirhna thar siam hnuaiah hian pawn leh inchhungah pawh punkhawmna siam khap a ni a, inneih inkhawmah mi 20 chin chauh tel phalsak niin a lawmna buatsaih khap a ni bawk. Sakhaw hmun hrang hrangah te ṭum khatah mi panga aia tam awmkhawm phal a ni lo.

Hri kai an pun belh zel avangin sorkar chuan state chhunga zirna in hrang hrangte chu tiam chin awm loa khar an ni tih nimin khan a puang. May 11 aṭanga ṭan tur, High School Leaving Certificate (HSLC)/Assam High Madrassa (AHM) Examination leh Higher Secondary Final Examinations 2021 pawh sawn hlat a ni bawk. Exam neih hun tur ruat fel a la ni lo a, an state dinhmun azirin ngaihtuah chawp a la ni dawn tih an sawi.

District-a hri kai mek, active case 100 chuang awmnaa lower primary school-te pawh khar tir vek an ni tawh. Heng district-te hi Kamrup (Metro), Dibrugarh, Nagaon, Jorhat, Tinsukia, Cachar leh Sonitpur district-te an ni.

Hri leng dinhmun a ṭha lo : Himanta Biswa Sarma
Health minister Himanta Biswa Sarma chuan an state-a Covid-19 hri leng mek dinhmun chu a ṭha lo hle tih a sawi. Thawhlehni khan hri kai thar mi 4,474 awmin, hemi ni hian hri vanga thi mi 41 an awm bawk. State chhunga hripui vanga thi hi mi 1,430 an tling tawh a ni.

Sarma chuan tunhnaiah hri kai thar 5,000 dawn an tlin chhoh ṭhin avangin an dinhmun chu a ngaihtuahawm hle a ni a ti a, hemi rual hain hri kaite enkawlna turin sorkar chu theihtawpa a lo inbuatsaih thu leh, hospital khum leh ICU khumte pawh tihpun a nih thu a sawi.

Journalist 100 hnenah vaccine pe
Assam hian nimin aṭang khan kum 18-44 inkar hnenah Covid-19 vaccine pek chhuah a kalpui ṭan a, a bul ṭanna atan Guwahati Presss Club-ah he kum huama awm, journalist 100 hnenah vaccine hi pek hmasak an ni.

Minister Sarma chuan a bul ṭanna atan journalist-te hnena vaccine hi pek a ni a, May 7 aṭangin a nawlpui tan kalpui a ni dawn tih a sawi. Assam hian Bharat Biotech hnen aṭangin Covaxin dose nuai 1.5 a dawng thar a ni.