Assam-in Manipur tan oxygen MT 3 a thawn
Manipur-in hri kaite enkawlna tur oxygen indaih lohna a tawh mek puihna turin Assam chuan oxygen metric ton 3 chu Manipur tan an thawn tih a sawi.
Assam health minister Himanta Biswa Sarma chuan Manipur indaih lohna pui thei tura an awm chu lawmawm a tih thu a sawi a, hmarchhak state dang leh hmun dangte pawh an theih anga puih zel kan inhuam a ni, a ti.
Manipur chief minister N Biren Singh chuan Assam chief minister Sarbananda Sonowal leh health minister Himanta Biswa Sarma-te chungah lawmthu sawiin, an mamawh lai taka Nagaon leh Silchar plant aṭanga oxygen an pe chu lawmawm a tih thu a sawi.
Thawhlehni khan Manipur-ah Covid-19 hri kai thar mi 433 awmin, kumina ni khata hri kai an tam ber ni a ni. Hemi ni hian hri vangin mi pahnih an thi bawk. Hri kai enkawl mek hi 2,391 an awm a, an zinga 115 chu security force mi leh sa an ni. Hripui vanga thi hi mi 424 an awm tawh bawk.
Hri kai an pun zel avangin sorkar pawhin Thawhlehni khan khuahkhirhna a siam belh leh a, Greater Imphal leh Imphal Municipal Council (IMC) huam chhungah essential service tih loh chu motor reng reng tlanchhuah a khap.