Manipur CM-in journalist-te frontline woker-ah puang

Manipur chief minister N Biren Singh chuan an state-a journalist-te chu hri leng dona kawnga a hmatawngtu, frontline worker zingah telh an ni tih Nilaini khan a puang.

Hemi hma hian Bihar, Uttar Pradesh, Odisha, West Bengal, Tamil Nadu, Punjab leh Madhya Pradesh-te pawhin journalist-te hi frontline worker-ah an lo puang tawh a ni.

CM chuan hemi chungchang hi a twitter-ah tarlangin, "Dinhmun hlauhawm tak karah kan journalist-ten mipuite hnena chanchin thar pekchhuahna tura an inpekna hi kan hriatpui a, frontline worker dangte nen an inpekna hi a danglam lo. Hei vang hian frontline warrior-ah kan puang a, vaccine peknaah pawh journalist-te chu dah pawimawh hmasak zingah an tel dawn a ni," a ti.

Manipur-ah ni khata hri vanga thi tam ber ni thleng

Manipur state-ah Nilaini khan Covid-19 vang mi 10 an thi a, nikhatah an state-a hri vanga thi an tam ber ni a ni. Hripui vanga thi hi mi 434 a awm tawh.

Nilaini vek khan hri kai thar 397 an awm belh leh bawk a, state puma hri kai hmuh chhuah tawh hi mi 33,353 tling tawhin, hri kai mek mi 2,657 an awm a, recovery rate hi 90.73% ah a tlahniam tawh bawk.

Nilaini khan hri kai enkawlna, Covid Care Centre pali siam belh chu hman ṭan a ni tih chief minister N Biren Singh chuan a sawi a, heng hmunah hian khum 1,000 chuang a awm a ni.