Meghalaya-in kum 18 chinte a thlawnin vaccine pe dawn

Meghalaya chief minister Conrad K Sangma chuan kum 18 chunglamte hnenah state sorkar chuan a thlawnin Covid-19 vaccine a pe dawn tih Nilaini khan a puang.

CM hoa high level meeting neihah, a thlawna vaccine pek hi an rel a ni.

Deputy chief minister Prestone Tynsong chuan state sorkar chuan vaccine dose 42,000 leina turin a siamtu hnenah cheng vaibelchhe 1.26 a pe fel vek tawh tih a sawi. "State sorkar hian vaccine hi dose khat Rs 300 zelin a lei a, hengte hi kum 18-45 inkar hnenah a thlawnin pek an ni dawn a ni," a ti.

Vaccine-te hi ni rei loteah an rawn thawn theih tawh beisei a nih thu sawiin, Dy CM chuan a thawh khatnaah kum 18-45 inkar mi 20,000 hnenah pek a ni dawn tih a sawi. Frontline worker leh kum 45 chunglamte hnena vaccine pek tur pawh an la ngah tawk tih a sawi bawk.

Meghalaya-ah hian healthcare worker zingah vaccine dose khatna la tawh mi 25,595 an awm a, dose hnihna nena la zo tawh mi 18,596 an awm tawh bawk. Frontline worker 46,411 hnenah pek a ni tawh bawk a, an zinga 24,885 chuan a dose hnihna an la zo tawh a ni. Kum 45 chunglam mi nuai 1.74 in vaccine dose khatna hi la tawhin, dose hnihna la fel tawh mi 18,764 an awm tawh bawk a ni.