Nagaland sorkarin private hospital-te hnenah Covid-19 kaite tan khum 50% dah turin a hriattir

Nagaland sorkar chuan state chhunga private hospital zawng zawng hnenah, hri kai an pun belh zel avangin a ṭul thulha hman theih turin an hospital-a khum 50% chu Covid-19 kai enkawlna tura dah turin a hriattir.

Chief secretary J Alam chuan Ningani khan hemi chungchanga thupek hi tichhuakin, state-level COVID war room-a sawihonaah hri kaite enkawlna tura ICU khum, oxygen-supported bed leh ward bed siam ngai zat chungchang hi an ruahman tih a sawi.

Disaster Management Act, 2005-a section 24 leh 65 bakah, Epidemic Diseases Act 1897-a section 2 hnuaiah private hospital-te hi Covid-19 hri kaite enkawl thei vek tur leh, ward pangngaia khum an neih zat aṭanga 50% chu hri kaite tana dah a, ICU pawh ruahman tel turin sorkar chuan a hriattir a ni.

Thawhṭanni leh Thawhlehni khan private hospital leh sorkar aiawhte an lo inkawm tawh a, hri kaite enkawlna pek thuai an nih theihna tura private hospital-te pawh hman ṭul hun a la awm theih thute an sawiho a ni.

Private hospital-a hri kaite enkawlna man lak chungchangah pawh a tlawm thei anga ti tura tih a ni bawk a, hospital-ten enkawlna man an lak zat tur chu hospital thuneitute chuan mipuite hmuh theih turin an pholang tur tih a ni bawk.

Sorkar thupek zawm lo hospital-te chu Epidemic At 1897 leh Disaster Management Act 2005 bakah, Nagaland Healthcare Establishment Act 1997 leh IPC hnuaiah hremna pek theih an ni ang.