AP doctor-ten nawrh hun titawi
Indian Medical Association (IMA-AP) Arunachal Pradesh unit leh Arunachal Pradesh Doctors' Association (APDA)-ten ni hnih chhung, nimin leh vawiina nawrh huaihawt an tum tawh chu ni khatah an titawi a, niminah chauh nawrh an huaihawt.
Doctor pawl pahnih an thawhpui doctor-te kutthlak a nih vang leh, Naharlagun-a the Samaritan Hormin Hospital suasam a nih avangin ni hnih chhung nawrh huaihawt an tum tih Nilaini khan an lo sawi tawh a ni. Mahse Ningani khan doctor pawl pahnih aiawhte leh health minister Alo Libang chu Civil Secretariat-ah an inkawm a, meeting zawh hnuah nawrh huaihawt hun hi tihtawi a nih thu an puang a ni.
Thawhṭanni, May 3 khan Samaratin Hormin Hospital-a hmeichhe pakhat chu khup zai a nih hnuah a thi a, a thih danah a chhungte lungawi loin, damdawi-ina thawktute inthlahdah vangah an puh. Mipui lungawi lo chuan doctor duty pahnih, Dr Tabu Muri leh Dr Nabam Jabav-te chu kut an thlak bakah, hospital pawh an suasam zui bawk.
IMA-AP leh APDA chuan doctor-te beih an nih avanga hian state pum ni hnih chhung nawrh huaihawt an tum thu an puang zui a ni.
Arunachal Pradesh State Commission for Women (APSCW) chuan Itanagar Capital Region-a police superintendent hnenah thawktute inthlahdah avanga thi nia sawi hi chhui chiang turin a ngen nghal bawk. Hemi rual hian mipuite chu an thua dan lo lekkawh mai lo a, police-te hmalakna ngaichang a thawhpui turin APSCW chairperson Radhilu Chai chuan a ngen.