Zirlai pawlte'n Manipur CM hnenah ngenna thlen

Manipur Students’ Association, Delhi; Naga Students’ Union, Delhi leh Kuki Students’ Organisation, Delhi & NCR-te chuan Manipur chief minister N Biren Singh hnenah ngenna thlenin, Delhi leh NCR-a Manipur mi, Covid-19 hri kaite chu damdawi lama enkawlna ngaihtuahsak turin an ngen.

Zirlai pawl pathumte hian CM hnenah hian joint letter thawnin, Delhi & NCR chu Covid-19 hri leng hluarna a ni a, hri kai an tam avangin damdawi-in leh Covid Care Centre-ah dam lo enkawlna tur khum pawh a indaih tawh lo hle tih an sawi. Hei vang hian he khawpuia Manipur mi, hri kai awmte pawh in lamah an inenkawl a ngai a, tam tak chuan harsatna tawkin thihpui pawh an awm nual tawh a ni, an ti.

Hei vang hian Manipur sorkar chu Delhi-a NGO leh mimalte pawh thawhpui a, Covid-19 hri kaite enkawlna tur ngaihtuah sak bakah; damdawi, hospital khum, oxygen leh thil dang an mamawhte dinhmun hrilh hre ṭhin turin an ngen.

Khawpui chhunga oxygen leh hospital indaih lohna a nasat zel avangin, Manipur sorkar chu Manipur Bhavan-ah oxygen cylinder 20-30 bakah hri kai enkawlna tur damdawi mamawhte a ṭula hman theih tura chhawp tur te, Bhavan House-ah emergency-a hman tura ambulance pakhat dah tur te, Resident Commissioner/Deputy Resident Commissioner hoa Emergency COVID-19 Response Team din tur leh zirlai pawl hrang hrang aiawhte member-a dah tur tein an ngen a ni.