Assam CM thar tur Himanta Biswa Sarma

Assam-a sorkar thar siamtu tur Bharatiya Janata Party (BJP) chuan hun eng emaw chen Chief Minister thar tur an puang mai lo a, state leh central lama party hruaitute an inrawn hnuah CM thar atan Himanta Biswa Sarma thlan a nih thu Inrinnni khan an puang ta a ni.

Inrinnia Assam BJP legislature party meeting-ah union agriculture minister Narendra Singh Tomar chuan Himanta Biswa Sarma chu Assam-a BJP legislature party leader atan thlan a nih thu a puang a, hei hi party MLA te pawhin an thlawp vek a ni. He meeting-ah hian BJP observer Tomar, Arun Singh, BL Santosh leh Baijayant Panda bakah Assam MP Pallab Lochan Das leh Dilip Saikia-te pawh an tel.

Assembly inthlan dawn khan BJP hian chief ministerial candidate a siam lawk lo a, hei vang hian inthlan result puan a nih hnuah CM nilai Sarnananda Sonowal nge Himanta Biswa Sarma zawk hi CM dawn tih pawh ngaihven a hlawh hle a ni.

Inthlanah hian BJP kaihhruai National Democratic Alliance (NDA) chuan assembly seat 126 awmah seat 74 an la a, BJP hian party malin seat 60 a la bawk.

Assam CM thar tur, Himanta Biswa Sarma hi kum 52 mi niin, kum 2015-ah Congress party aṭangin BJP hi a zawm a ni a, BJP dinhmun chawikangtuah mi tam takin an ngai. Tarun Gogoi kaihhruai Congress sorkar term thumah khan cabinet minister a ni vek a ni. Kum 2016-a BJP kaihhruai sorkar a din khan ministry pawimawh tak tak a chang chho nghal bawk. State chhunga Citizenship Amedment Act (CAA) duh loa nawrh huaihawt a nih laite pawh khan, CM Sonowal aiin media mite a hmachhawn ngun zawk bawk.

Health minister ni bawkin, state chhunga Covid-19 hri leng thawh khatna dona kawngah pawh a kaihhruaina hnuaiah chak takin hman an la a ni. Mahse April thlaa inthlan campaign neih laia Assam-ah Covid-19 hri a awm tawh lo nia a sawi erawh chuan sawisel a hlawh zui hle.

Himanta Biswa Sarma hi kumin assembly inthlanah khan Jalukbari bialah thlan tlin niin, a zawna term nga a tlinna a ni. He bialah hian amah hnaih bertu, Congress candidate Romen Chandra Borthakur chu vote 1,01,911 in a hneh.

Sonowal-a'n banna a thehlut
Assam chief minister Sar­bananda Sonowal chuan nimin khan governor Jagdish Mukhi hnenah banna a thehlut.

Inrinni khan Sonowal hi BJP national president JP Nadda leh union home minister Amit Shah-te hoa party hruaitute meeting neihah a tel a, he hunah hian Himanta Biswa Sarma pawh a tel a ni. He meeting-ah hian Assam CM thar atan Himanta thlan fel a nih tak avangin, nimin khan Sonowal hian banna hi a thehlut zui ta a ni.