Pradyot Deb-a'n Covid-19 hri dona atan A kum khat hlawh a thawh dawn

Tripura-a Tipraha Indigenous Progressive Regional Alliance (TIPRA) chairman Pradyot Kishore Deb chuan an state-a Covid-19 hri leng dona atan a kum khat hlawh a thawh dawn tih a sawi.

Deb Barman hi Tripura Tribal Areas Auto­nomous District Council (TTAADC) election neih zawh takah khan district council member atan Takarjala-Jampuijala con­s­ti­tuency-ah thlan tlin a ni. He inthlanah hian TIPRA leh a thawhpui, Indigenous Nationalist Party of Twipra (INPT) chuan seat 28 awmah seat 18 an la a ni.

TIPRA chairman chuan a twitter-ah hemi chungchang hi ziak langin, "Ka kum khat hlawh chu la loin, corona hri leng do letna atan te, in leh zirna thuamṭhatna atana a ṭul atana hman turin ka pe dawn a ni. TTAADC sorkar chuan hmasawnna hna thawhna turin sum a ngah tawk lo hle a, hei vang hian ka tih theih ve chu ka hlawk lak loh hi a ni," tiin hmasawnna hna thawhna kawngah theihtawp chhuah turin midangte a ngen nghal bawk.

Hemi hma hian execu­tive member pahnih, Rajesh Tripura leh Sohel Debbarma-te chuan police superintendent hnenah lehkha thawnin, escort vehicle an pek ṭhin chu titawp a, hemi atana senso chu TTAADC development fund atana pe zawk turin an ngen.

Deb Barman chuan TTAADC chief executive member Purna Chandra hnenah council thar hnuaia audit-te tihfel a nih hma chuan thil sak leh siam thar hna kalpui remti rih lo turin a ngen bawk a ni.