Assam CM atan Himanta Biswa Sarma la lut

Assam chief minis­ter 15-na atan BJP hruaitu, Himanta Biswa Sarma chu nimin chhun khan rinawmna thu tiam tira lakluh a ni.

CM thar lakluh rual hian MLA 13-te pawh minister atan lakluh ve nghal an ni bawk. Minister atana lakluhte hi BJP MLA 10, Asom Gana Parishad MLA panih leh United People's Party Liberal MLA pakhat an ni a, minister-te chanpual tur erawh siamfel a la ni lo.

Minister atana lakluh thar zinga sorkar hmasaa minister lo ni tawh mi pasarih awmin, hmel thar paruk an awm thung. Hmel thar zingah hian Assam state BJP president Rabjet Kr Dass pawh a tel.

Kum 52 mi, Himanta Biswa Sarma hi governor Prof. Jagdish Mukhi chuan Srimanta Sankardev Kalashetra-ah rinawmna thu tiam tirin a lalut a, Sarma hian Assamese-in rinawmna thu hi a tiam a ni.

Assam assembly in­thlana BJP leh a thawh­puiten hnehna an chan hnuah sorkar thara Chief Minister tur hi tihfel a ni nghal mai lo a. Pathianni khan Assam BJP Legislature Party chuan hruaitu thar atan North East Democratic Alliance (NEDA) convenor Sarma hi an thlang ta a ni. Legislature party leader atana Sarma rawttu hi Sonowal a ni a, state president Ranjit Kumar Dass-a'n a lo pui bawk a ni.

Nimina CM thar lakluh inkhawm hi BJP national president JP Nadda chuan a hmanpui a, Tripura CM Biplab Kumar Deb, Meghalaya CM Conrad K Sangma, Manipur CM N Biren Singh leh Nagaland CM Neiphiu Rio bakah Assam CM hlui Sarbananda Sonowal-te pawh an tel.

Centre-ah Sonowal a lut dawn?
CM kal chhuak, Sarbananda Sonowal hi sorkar tharah hian minister-ah dah a ni lo a, mahse sorkar laipui lamah chanvo a nei thei dawn nia sawi thawm a awm thung. Assam-ah hian Rajya Sabha member, Biswajit Daimary chuan nikum November thla khan Bodoland People's Front (BPF) aṭanga BJP a zawm avangin MP a nihna aṭangin a bang a, a seat hi hnawh khat a la ni lo. He seat-ah hian Sonowal hi dingin, union council of minister-ah a lut dawn niin report ṭhenkhat chuan an tarlang.

Sonowal hi prime minister Narendra Modi kaihhruai NDA sorkar hmasaah khan union sports minister pawh a lo ni tawh a ni.