Tripura-in oxygen stock a ngah tawk : CM Deb

Tripura chief minister Biplab Kumar Deb chuan an state-in Covid-19 hri kaite enkawlna tur oxygen stock a ngah tawk tih sawiin, mipuite tan thlaphanna tur a awm lo, a ti.

CM chuan oxygen cylinder 4,000 leh concentrator 750 stock an neih thu sawiin, "Dam lo enkawlna tura mamawh kan ngah tawk a, mipuite tan thlaphanna tur a awm lo. Tripura-a hri kai enkawl dam, recovery rate chu 92% niin, state dang tam zawk aiin a ṭha zawk a ni," tiin a sawi.

Health department chuan district leh sub-divisional hospital tinah oxygen an mamawh ang an neih theihna tura supply turin hma a la zel tih CM chuan a sawi bawk. Inrinni liam ta khan Deb hian Bodhjugnagar-a oxygen plant a tlawh a ni.

Covid vaccine pek hna pawh nghawrh taka kalpui a nih thu Tripura CM chuan a sawi a, kum 18-44 te hnena vaaccine pek tur pawh order an tifel vek tawh a, pek theih a ni thuai ang, a ti. Tripura-ah hian mi nuai 14 vel hnenah vaccine hi pek a ni tawh.

Senior minister leh cabinet thupuangtu, Ratan Lal Nath chuan hri leng mekah damdawi lam thawktu indaih lohna phuhruk nan Tripura Public Service Commission kaltlangin contractual basis-in doctor 164 lak thar a ni dawn tih a sawi bawk. May thla chhungin doctor tharte hi lak fel an ni ang.