India state ṭha 5 zingah Assam tel tir kan tum : CM Sarma

Assam chief minister thar Himanta Biswa Sarma chuan lakluh a nih hnua thu a sawiah, a kaihhruai sorkar chuan kum nga chhungin Assam chu India rama state ṭha panga zingah tel tir a tum dawn tih a sawi.

Thawhṭannia Chief Minister atana lakluh a nih hnua chanchinthar lakhawmtute a kawmnaah Sarma chuan he thu hi sawiin, "Kan thil tum tihlawhtling tur hian naktuk aṭangin kan thawk nghal dawn a ni," a ti.

North-East Demo­cratic Alliance (NEDA) convenor ni bawk, Sarma chuan Assam-a BJP kaihhruai sorkar pahnihna chuan a hmalakna hmasa ber tur chu an state-a Covid-19 hri leng mek thunun a, inthlan dawna an thutiamte tihhlawhtlin leh kumtina tuilian vanga chhiatna nasa tak thleng ṭhin laka fihlim tura siamte a ni tih a sawi.

"Assam-a Covid-19 hri leng mek dinhmun h a ṭha lo hle. Nitin hri kai thar 5,000 kan chuang ṭhin a, cabinet meeting hmasa berah hemi chungchang hi sawiin, hma lak dan tur kan ngaihtuah ang," tiin CM thar chuan a sawi a ni. Assam-a hri leng chu an thunun theih loh chuan, hmarchhak state dangah pawh hri kai hi an tlahniam thei dawn lo a ni, a ti.