BJP worker-ten Tripura CM hlui Manik Sarkar an bei

Tripura chief minister hlui, CPI (M) hruaitu Manik Sarkar, deputy opposition leader Badal Choudhury leh an party hruaitu dangte chu Thawhṭanni tlai khan South Tripura-a rorellai, BJP worker nia sawiten an bei.

Manik Sarkar leh party hruaitute hi hmun danga inbeihna thlenga an party worker hliam tuarte tlawh turin South Tripura-a Shantirbazar an pan a, kawng lakah BJP worker nia sawi mi eng emaw zatin an motor-te hi lo tidingin, Tripura police-te awm lai rengin an lo bei a ni.

Sarkar chuan an state-a BJP hruaitu chuan misualte rilruah eptu pawl hruaitute kutthlak leh beih duhna thinlung a tuhsak a ni tiin, "Heng thil thlengte hi mipuite chuan an hre reng ang. Awlsam takin kan theihnghilh mai dawn lo. Eptu hruaitute bitum kan ni fo mai hi pawmzam mai chi a ni lo," tiin a sawi.

Chief minister Biplab Kumar Deb chu an state-ah dan rorelna lekkawh thei loah Sarkar chuan a puh a, BJP sorkar chuan Tripura chu rorelna mumal awm lohnaah a siam a ni tiin, mipuite chu rorelna dik lo leh sorkar kalphung dik lo do let tura inlungrual turin a ngen.

CM hlui chuan venhimna ṭha an pek duh loh avangin police official-te pawh a dem tih a sawi bawk.

March thla tir lam khan Badal Choudhury hian CPM hruaitu lawmna programme hmang tura Manirampara pana kal laiin beih a lo tawk tawh bawk a,heng mite pawh hi BJP worker niin an sawi.

Hetih lai hian law minister Ratan Lal Nath chuan pawikhawihna thlengah hian BJP worker-te an inhnamhnawih lo niin a sawi thung. CMP thlawptu ṭhin, tuna Sarkar leh a team-te laka lungawi lote an nih zawk a rinawm thu a sawi a ni.