Japan leh UNDP-in hmarchhak state pathumah oxygen plant siam dawn

Japan sorkar leh United Nations Development Programme (UNDP) thawkdun chuan hmarchhak state pathum - Meghalaya, Nagaland leh Tripura-ah oxygen generation plant an siam dawn.

Official thuchhuah an siamin, "Nikum June thla aṭang khan Japan sorkar leh UNDP India chuan India sorkarin hri leng dona kawnga a hmalakna an theih angin an ṭawiawm a, health leh social protection system thuam chakna tur leh, hrileng vanga dinhmun harsa taka awmte chawikanna turin an thawk a ni," tiin an tarlang.

India rama hri leng hluar chho leh mekah ram chhung hmun hrang hrangah hri kaite enkawlna tura medical oxygen mamawh indaih lohna a nasa chho hle a, hei vang hian oxygen mamawhte an hmuh zel theihna atan Japan mipuite thlawpnain UNDP chuan hmarchhak state pathumah hian pressure swing adsorption (PSA) oxygen plant pariat an din dawn tih an sawi.

Oxygen generation plant hi heng state pathuma damdawi-in, khum 1,300 chin awmnaah an siam dawn a, heng aṭanga oxygen siam chhuahte a ṭul dan azirin health facility-ah sem a ni ang. A hma thei anga oxygen siam chhuah hna hi kalpui a nih theihna atan hma lak ṭan nghal a ni tih an sawi bawk.