Hri leng dona atan Assam-in hmalakna thar siam

Assam chuan an state-a hri leng hluar chho zel dona kawnga hmalakna thar a siam a, kartin Nilaini apiangah state dinhmun thlirin cabinet meeting neih ziah a ni ang.

Cabinet minister tinte chu boruak awmdan thlithlai leh mipuite dinhmun enfiaha district pahnih emaw pathum tlawh tura tih an ni a, an kalna tur hi chief minister Himanta Biswa Sarma chuan a sem ṭhin dawn ni. District commissioner-te kawmin an district dinhmunte an sawipui ang a, ni thum hnuah CM leh health minister Keshab Mahanta hnenah report an thehluh ang.

Assam-ah hian Covid-19 hri kai an pung chak chho leh hle. April 5 khan state pumah active case 515-ah an tla thla hman a, mahse hemi hnu lamah hian hri kai thar hi an pung chho zel a, ni khatah hri kai thar hi 5,000 chuangte an ni chho tawh a ni.

May 10 khan hripui vangin mi 77 an thi a, hei hi Assam-a ni khata hri vanga thi an tam ber ni a ni. Covid19 thihpui hi mi 1,753 an awm tawh.

Vawiin aṭangin khuahkhirhna khauh zawk hmang dawn
Vawiin aṭangin hri darh zel tur venna atan state chhungah khuahkhirhna thar leh khauh zawk hman a ni dawn a, hemi rual hian total lockdown puan tumna erawh a la awm lo tih heath minister Mahanta chuan a sawi.

Dawr leh sumdawnna hmunte chu chawhnu dar 1-ah khar vek tura tih an ni a, weekly haat/bazar-te chu ni 15 chhung hawn phal an ni lo ang. Sorkar office leh private office-te pawh ni 15 chhung khar tura tih an ni bawk. Emergency thilah Deputy secretary leh a chunglam rank officer-te chu chawhnu dar 1 thleng office kal phalsak an ni thung.

Ni 15 hnuah he khuahkhirhna hi hman chhunzawm zel a la ngai a nih chuan, cabinet chuan meeting lehah dinhmun harsa zawkte chhawmdawlna siam dan tur a ngaihtuah dawn a ni, tiin Health Minister chuan a sawi.

Cabinet meeting hmasa berah high-level committee pahnih siam rawt a lo ni tawh a, finance minister Ajanta Neog kaihhruai committee chu ṭhalai hna nei lote tana hna nuai khat siam tur ngaihtuah tura tih niin, minister Ashok Singhal kaihhruai chu sumdawng tenau loan lak ngaihdam an nih theih dan tur buaipui tura tih an ni bawk.