Covid-19 data-ah thup nei lo turin Manipur sorkar ngen

Manipur Congress party chuan a state-in Covid-19 hri leng thawh hnihna an tawrh mekah mipuite nunna chhanhim tura chak taka hma la turin state sorkar an ngen. Hri vanga thi chhinchhiahnaah sorkar chu thup nei lo turin an ngen bawk.

Congress MLA K Meghachandra chuan virtual press conference a neihah, hri leng dona atana rawtna leh thil phut an neih hrang hrangte a tarlang a, chung zinga ṭhenkhat chu -

- District hospital tinah ventilator nena thuam khum 100 tal dah a, ICU bakah hri dona atana hmanraw pawimawhte district tinah a rang thei anga siam.
- MLA tinte hnenah an biala hri dona kawnga hmalakna turin cheng vaibelchhe khat ṭheuh state sorkarin pe rawh se.
- Damdawi lama thawktu indaih lohna phuhrukna turin state sorkar chu doctor leh nurse a ngheta la tur leh, health department staff-te lak belh turin an ngen bawk.
- Covid vaccine pek chhuah chak zawka kalpui turin an ngen a, nikhatah vaccine pek theih zat tihpun.
- District tinah ambulance pek belh an phut bawk.
- District tina nitina hri kai thar leh thihpui zat rate bakah, state pum nitin dinhmunte tarlang ṭhin turin an ngen. State sorkar chuan Covid-19 vanga thi leh nitin kai thar awm zat chungchangah thup leh zep a nei tur a nilo.
- Private hospital-a Covid-19 hri kaite enkawlna manah sorkar chu fixed rate siam turin an phut bawk a ni.
- Covid-19 vanga thi chhungte hnenah ṭanpuina leh chhawmdawlna pek.
- Sorark laipuiin MGNREGA tana state sorkar hnena a pek chhuah tawh, cheng vaibelchhe 485.5 chu hripui leng vanga ei leh bar lama harsatna tawk mek, thingtlang mite tan a rang thei anga pe chhuak turin an phut tih an sawi bawk.