Tripura : Care centre aṭangin hri kai 25 tlan chhuak

Tripura-a Dhalai district-a Ambassa Panchayati Raj Training Institute (PRTI) Covid Care Center aṭangin Thawhṭanni zan khan Covid-19 hri kai enkawl lai mi 25 an tlan chhuak a, nimin zing khan an zinga pariat chu man leh nghal an ni.

Kar thum liam taah khan Agartala-a Covid Care Centre-a hri kai enkawl lai mi 31 chu an lo tlan chhuak tawh bawk.

Ambasa police station-a officer-in-charge chuan hri kai tlanchhuakte hi West Bengal-a Malda district-a mite vek an ni tih a sawi, mi pariat an man lehte hi centre bula thingtlang khaw pakhatah an lo biru niin a sawi.

Tripura-ah hian rel hmanga khualzin lutte chu Covid-19 test neih tir zel an ni. Thawhṭanni khan Ambassa railway station-a khualzinte test an neihsakah mi 59 chu an positive a, Covid Care Centre-ah dah nghal an ni. Mahse an zinga 25 chu zanah an tlanchhuak nghal a ni.