Meghalaya sorkarin state mipuite RAT tih sak vek dawn

Meghalaya sorkar chuan state chhunga hri kai an pun belh zel avangin, hri darh tur venna kawng khat atan state mipui zawng zawng chu rapid antigen test (RAT) tihsak a tum.

Deputy chief minister Prestone Tynsong chuan, "State chhung mipui zawng zawngte RAT hi neih sak kan tum a, bul kan ṭan thuai ang," a ti. RAT neih theihna tur hmunte tihfel thuai a ni dawn tih a sawi bawk.

Tynsong chuan RAT neihna atan hian CHC, PHC leh sub-centre hrang hrang pawh thuam chak a ni dawn tih a sawi a, Asha leh Anganwandi worker-te pawh test runpui neihnaah hian chhawr tel an ni dawn a ni, a ti. Test neihna atan hian institution te pawh sorkar thlawp a, thawhpui turin an sawm dawn bawk a ni.

State sorkar leh hospital hrang hrangten theihtawp an chhuah chungin, an state-a hripui vanga thi, fatality rate chu a pung zel tih Tynsong chuan a sawi. "A vanduaithlak hle a ni. Hei vang hian mitinte chu kan beiseina tibo loin, sorkarin health department kaltlanga hri dona tura kaihhruaina a siamte chu zawmin, inlungrual takin thawk ho ang u. Hei hi hri vanga thi te, hri kai thar awmzat a tlakhniam theihna tur a ni," tiin a sawi.

Hetih lai hian state chhunga Covid-19 vaccine pek chhuah mekah, kum 45 chunglam zingah vaccine la zat an la tlem tih Deputy CM chuan sawiin, hei hi ngaihven a ṭul hle tih a sawi. Tynsong chuan an state-ah kum 45 chunglam vaccine la hi 37-38% vel chauh an la ni tih a sawi a, social media lamah vaccine chungchanga thu thang dik lo tak tak thehdarh a awm ṭhin vangin vaccine la ngam lo an tam phah nia a rin thu a sawi.

Tynsong chuan, "Health department hnenah pawh mipuite hnenah vaccine lak a pawimawh thu leh, a la thei chinte chu la vek tura fuih tura campaign ngawrh taka nei tur pawhin kan chah a ni," a ti.

Kum 18-44 inkar tana pek tur vaccine dose 42,000 pawh an dawng thuai dawn tih sawiin, hri kai tam zualna district-ahte vaccine hi pek tam a ni dawn tih a sawi. Hri kaite enkawlna turin sorkar chuan IIM, Shillong leh TB Hospital, Umsawli-ah khum 400 a siam belh tih Tynsong chuan a sawi bawk.