Meghalaya HM-in NEIGRIHMS a tlawh

Meghalaya health minister Al Hek chuan North Eastern Indira Gandhi Regional Institute of Health & Medical Sciences (NEIGRIHMS) hospital a tlawh a, Covid-19 hri kaite enkawlna kawnga an inbuatsaih dante a enfiah.

NEIGRIHMS director P Bhattacharya chuan Health Minister hnenahhian thawktu an indaih tawk loh dan te, oxygen khawl nena thuam khum siam belh a harsat dante a lo hrilh. Covid-19 hri leng dona kawngah ṭangkai leh chak zawka hna an thawh theihna turin budget tam zawk an mamawh thute a lo sawi a ni.

NEIGRIHMS-ah hian oxygen bed 100, Covid-19 hri kaihhnawih enkawlna tur bik khum 30 bakah Covid-19 ICU bed 25 a awm a ni.

Bhattacharya chuan theihtawp an chhuah tlang tih sawiin, MBBS zirlai leh intern ti mekte pawh in volunteer tura an ngen thu sawiin, Covid-19 hri kai enkawl tura training pawh pek an nih thu a sawi.

Health minister chuan hospital inbuatsaihna hrang hrang chu a lungawithlak hle tih sawiin, state sorkar pawhin a ṭul anga puih leh thawhpui zel a tum thu a sawi. Damlo zawng zawngte duat leh uluk taka enkawl zel turin hospital chu a chah bawk a ni.