Health department file tifel nghal zel turin Assam CM-in hriattir
Assam chief minister Himanta Biswa Sarma chuan hri leng dona kawnga chak zawka hma an lak theihna turin finance department official-te chu health sector dah pawimawh tura hrilhin, health department file-te chu tikhawtlai loa tifel nghal zel turin a hriattir.
Sarma hian health ministry a chang bawk a, Assam CM atana lakluh a nih khan a kaihhruai sorkar chuan state chhunga Covid-19 hri leng do hna chu a ngaihtuah leh dah pawimawh hmasak tur a nih thu a lo sawi tawh a ni.
Nilaini khan CM hian finance department official-te meeting a neihpui a, he hunah hian finance minister Ajanta Neog pawh a tel. Sarma chuan health department file-te chingfel nghal zel tura a hrilh bakah, welfare scheme atana fund-te pawh pe chhuak turin a hrilh bawk.
State hmasawnna tura hmalakna chu finance department-ah a innghat thui hle tih sawiin, CM chuan official-te chu kum nga chhunga theihtawp chhuaha an lo thawh tawh ang bawka state tana a ṭha thei ang bera thawk chhunzawm zel turin a chah.
Nikum October thlaa state sorkarin a siam, chhungkua enkawltu ber hmeichhiate chhawmdawlna atana Urunodoi scheme hnuaia hamṭhatna dawng thei tur pawh dah belh zel turin Sarma chuan a sawi. He scheme hnuaiah hian chhungkaw nuai 17 hnenah thla tin Rs 850 pek an ni ang. Hei bakah hian ṭhalaite thuam chakna tur, SVAYEM scheme fund pawh pe chhuak turin finance deparmtent chu a hrilh bawk a ni.