Tripura-ah kum 18-44 inkar vaccine pe ṭan

Tripura sorkar chuan Ningani aṭang khan state chhunga kum 18-44 inkar tan Covid-19 vaccine a pe ṭan.

Tripura law minister Ratan Lal Nath chuan Covaxin dose 15,150 an dawng a, hei hi pek ṭan nghal a nih thu sawiin, chief minister Biplab Kumar Deb duhdan angin rickshaw puller, autorickshaw driver leh high court-a thawkte pek hmasak an ni tih a sawi.

Meghalaya
Meghalaya chuan nimin aṭang khan vaccine hi a pe chhuak ṭan ve bawk.

NHM Mission director chuan April 28 aṭang khan CoWIN portal-ah registration hi hawn ṭan a ni tawh tih sawiin, sorkar facility hrang hrangah vaccine hi a thlawna pek a ni dawn a, mahse private hospital-ah erawh chuan dose khat Rs 500 man zel a ni thung dawn tih a sawi.

Ningani khan Meghalaya hian Covishield vaccine dose 42,000 a dawng a ni.

Nagaland leh Arunachal Pradesh
Nagaland sorkar chuan May 17 aṭangin kum 18-44 inkar tan vaccine a pe dawn tih a sawi. Nilaini khan Nagaland hian Serum Institute of India aṭangin Covishield vaccine dose 36,580 a dawng a ni.

State immunization officer Dr Ritu Thurr chuan nimin aṭang khan vaccine la turte tan registration leh booking tih ṭan a nih thu a sawi. Vaccine la turte hian CoWIN emaw, Aarogya Setu-ah emaw an in register a ngai a ni. Kum 18-44 inkar tan Thawhṭanni leh Thawhlehni apiangah vaccine hi pek chhuah niin, a bak ni dang chu kum 45 chung lamte vaccine lak hun atan dah a ni thung ang.

Arunachal Pradesh chief minister Pema Khandu pawhin kum 18-44 inkar tan May 17 aṭangin vaccine pek a ni dawn tih a sawi bawk. Vaccine la turte tan vawiin aṭangin Cowin-ah registration tih theih a ni ang.

AP hian Covishield vaccine dose nuai 4 a order a, Nilaini khan vial 20,180 a dawng a ni.

January 16-a vaccine pek chhuah ṭan a nih aṭang khan AP-ah hian mi 2,98,924 ten vaccine hi an la tawh. State immunisation officer Dr Dimong Padung chuan vaccine la tawh hi state mipui aṭanga 13.86% an ni tawh tih sawiin, dose kima la tawh 4.61% an awm tawh tih a sawi.