Assam CM-in zing dar 2:30-ah damdawi-in tlawh

Assam chief minister Himanta Biswa Sarma chu nimin zing dar 2.30 khan Gauhati Medical College Hospital tlawhin, hri kaite enkawl an nih dan a enfiah.

CM Sarma chuan hemi chungchang hi a twitter-ah tarlangin, "Zan rei hnuah dam lo na tak tak enkawl chu a hautak ṭhin hle a ni. Zing dar 2:30-ah GMH hi tlawhin, emergency ward-a Covid hri kaite enkawl an nih dante ka va en a ni. Thawktute hnathawh danah leh an dam lo enkawl dan a lungawithlak hle a, doctor nurse-te chungah lawmthu ka sawi a ni," a ti.

Sarma chuan zan rei lamah dam lo na zual thi an tam ṭhin tih sawiin, hei vang hian damdawi-in thuneitute hnenah pawh zan dar 11 leh zing dar 7 inkara senior doctor duty tir an nih dan turte pawh an sawiho thu a sawi.

"Senior doctor tam zawk hi chhun lamah an duty ṭhin a, mahse tunah chuan zanah pawh an duty ve tawh ang. CCTV camera pawh ward tinah dah niin, damlo te enkawl an nih dante pawh kan enfiah thei reng dawn a ni," tiin CM chua na sawi a ni.

Sarma chuan an state-in oxygen an ngah tawk thu a sawi a, GMCH-ah pawh khum indaih lohna a la thleng lo a, mahse hetichung hian khum dah belh erawh an tum tih a sawi.

Assam sorkar chuan nimin aṭang khan curfew hman hun pawh tiseiin, chawhnu dar 2 aṭanga zan dar 12 thleng curfew hi puan a ni. CM chuan, curfew hun chhung tihsei hian Guwahati-ah hri kai thar pawh an tlahniam tih sawiin, he ruahmanna thar an siam aṭanga kar khat hnuah positivity rate pawh an zirchian leh tur thu a sawi bawk.

ULFA-I-in ni 90 chhung inkahhai puang
Assam helpawl, United Liberation Front of Asom - Independent (ULFA-I) chuan ni 90 chhung atan inkahhai an puang tih Inrinni khan an sawi.

Paresh Baruah kaihhruai ULFA-I hian Assam-a hri lengin zual lam a pan zel avangin he thutlukna hi an siam tih an sawi a, May 15, Inrinni aṭang khan hman ṭan nghal a ni tih an sawi bawk.

ULFA-I hian sorkar nena inkahhai an puan ṭum hnihna a ni a, kum 2006 khan a ṭum khatna atan an lo puang tawh a ni. Kum 1979-a din, ULFA hi Assam state chhung hmun hrang hrangah pawikhawihna an thlen nasa tawh hle. Kum 2011 khan an pawl Arabinda Rajkhowa lamṭang pawlte chuan sorkar nena inremna kawnga zawnga inbiakna nei turin inkahhai an puang a, mahse hei Paresh Baruah lamṭangte hian an thlawp ve lo thung.

Inrinnia inkahhai an puan thu an sawi hma hian, Assam chief minister Himanta Biswa Sarma chuan Paresh Baruah chu inremna kawng zawnga inbiakna neihpui turin alo sawm tawh a ni.