Meghalaya-ah ni khatah hri vangin mi 21 thi

Meghalaya state-ah Inrinni liam ta khan Covid-19 hri vangin mi 21 an thi a, an state-a ni khata hripui vanga thi an tam ber ni a ni. Hripui vanga thi hi mi 301 an tling tawh.

Inrinni vek hian hri kai thar mi 560 an awm bawk a, hri kai hmuh chhuah tawh hi mi 22,763 awm tawhin hri kai mek, active case 4,338 an awm. Hri darh tur venna atan Shillong khawpuia curfew puan chu May 24 thleng pawhsei a ni bawk.

Meghalaya health secretary Sampath Kumar chuan an state-a hri darh dan enin, May thla tawpah chuan hri kai hi 8,000 - 10,000 ah an punchhoh a rinawm thu a sawi. Hemi rual hian hri kai an punna chhan chu test an neih ṭhat vang niin a sawi a, RAT hmangin a tam thei ang ber test an nei tih a sawi.

State sorkar chuan hri leng chungchang leh inenkawl danah mipuite zirtirna pe turin state coordination communication unit a din a, he committee hian journalist-te pawh training an pe dawn a ni.