Vawiin aṭangin Agartala-ah lockdown puang

Tripura sorkar chuan vawiin aṭangin Agartala Municipal Corporation (AMC) area-ah ni 14 chhung atan lockdown a puang.

Agartala khawpuiah Covid-19 hri kai thar an pun chhoh leh avangin State Executive Committee chuan AMC ward zawng zawng huam chhungah lockdown puan hi a rel a ni. Hetih lai hian state pum huap anga lockdown puan tumna erawh a awm rih lo niin an sawi.

AMC-ah hian ward 49 awmin, mi nuai ruk chuang an cheng a ni. Containment zone pathum puan a ni tawh a, heng huam chhungah hian door-to-door survey pawh neih chhoh mek a ni. Health department chuan AMC area-a in tinah rapid antigen test (RAT) neih tum a nih thu an sawi bawk.

Itanagar-ah lock-down pawtsei
Arunachal Pradesh sorkarin Itanagar Capital Region-a lockdown a puan chu kar hnih chhung atan a pawtsei.

Itanagar Capital Region (ICR) Deputy Commissioner Talo Potom chuan lockdown pawhsei a nih thu hi puangin, May 31 thleng hman chhunzawm a ni dawn tih a sawi. State chhung hmun danga zan lam curfew puan pawh hman chhunzawm zel a la ni ang.