Ni 15 chhungin Assam-ah hri kai thar 71,856 awm

Asssam state-ah ni 15 liam ta chhung khan Covid-19 hri kai thar mi 71,856 an awm a, positivity rate hi 8.55% a tling.

State health department-in a tarlan danin, May 3 hnu lamah hri kai thar hi an pung chho nasa hle. May 1-ah positivity rate hi 6.39% a ni a, mahse hemi hnu hian pun lam an pan chho zel a ni.

Ni 15 chhunga hri kai hmuh chhuah thar zingah 20,568 hi Kamrup district-a mi an ni.

State sorkar chuan hri darh zel tur venna atan khuahkhirhna khauh zawk a siam tawh a, chief minister Himanta Biswa Sarma leh a cabinet minister-te pawhin medical college leh district hospital hrang hrangte tlawhin, an dinhmunte an enfiah sak bawk.

Pathianni khan hri kai thar mi 3,650 awm belh lehin, hemi ni vek hian hripui vanga thi mi 56 an awm leh bawk. State chhunga Covid-19 vanga thi hi mi 2,179 an tling tawh a ni.

Tripura-ah hri kai tam ber ni thleng
Tripura state-ah Pathianni khan hri kai thar 761 awmin, ni khatah hri kai tam ber ni a thleng. Hemi ni hian hripui vanga thi mi 10 an awm bawk.

Hri kai mek, active case hi 4,561 awmin, state positivity rate hi 5.17% a ni. Hripui vanga thi mi 438 awm tawhin, thi zat hi 1.07% a ni. Tripura-a Covid19 kai hmuh chhuah tawh hi 40,816 an awm tawh a, an zinga 35,756 chu enkawl dam an ni tawh thung.

State sorkar chuan hri darh zel tur venna atan Agartala Municipal Corporation (AMC) leh civic body paruk huam chhungah nimin aṭang khan ni 10 awh tur curfew a puang a, mahse state chhung hmun dangah erawh lockdown puan tumna a awm rih lo tih a sawi.