BJP hruaitu thih dan chungchang post-tu mi pahnih man
Manipur-a journalist Kishorechandra Wangkhem leh political activist Erendro Leichombam-te chu state BJP president Saikhom Tikendra Singh thih dan chungchangah an thu post avangin police-ten an man.
Manipur state BJP president Singh hi kar liam ta Ningani zan khan Covid-19 hri vangin Imphal-a Shiija Hospital-ah a thi a ni.
Wangkhem leh Leichombam-te hian Manipur BJP hruaitu thih chungchangah, "Bawng ek leh bawng zun chuan hna a thawk lo a nih hi," tiin social media lamah an comment a ni. An thu post avang hian state BJP vice president Usham Deban leh general secretary Premananda Meitei-te chuan complaint an thehlut a, Wangkhem leh Leichombam-te hi police-ten an man zui nghal a ni. BJP MP Leishemba Sanajaoba leh BJP worker eng emaw zat chuan heng mi pahnihte thu post avang hian lungawi lohna an lo lantir tawh bawk.
Journalist Wangkhem hi a hmain social media lama a thu post avangin ṭum hnih man a lo ni tawh bawk a, Manipur-a BJP kaihhruai sorkar chuan National Security Act (NSA) hnuaiah thubuai a siamsak tawh bawk a ni.