Assam : May 21 aṭangin district inkalpawh khap dawn

Assam State Disaster Management Authority (ASDMA) chuan an state-a Covid-19 hri darh zel tur venna atan May 21 aṭangin district inkalpawh khap a ni dawn tih a sawi. He khapna hi ni 15 chhung hman a ni ang.

Khapna thupek hian emergency leh essential service erawh a huam lo ang.

Thawhṭanni khan Assam-ah hian Covid-19 hri kai thi 92 an awm a, ni khata hripui vanga thi an tam ber ni a ni. Hemi ni vek hian hri kai thar 6,394 awmin, an zinga 1,100 chu Guwahati khawpuia mi an ni. Tun hnaia India rama hri kai pun chakna state panga zingah Assam hi a tel.

Assam transport minister Chandra Mohan Patowary chuan Thawhṭanni khan district transport officer-te virtual meeting a neihpui a, public transport-a Covid-19 protocol kalpui a nih dante a sawipui. Minister chuan department official-te chu Covid-19 guideline siamte khauh taka kengkawh zel turin a hriattir a, hemi rual hian khuahkhirhna siam a nih chhunga mipuite nitin khawsakna atana an mamawh hrang hrangte an tlakchham lohna tura theihtawp chhuah zel turin a ti bawk. Eitur phurtu motor pawh an mamawh zat a awm em tih fiah reng turin a chah

AP : Hri kai thar tam ber ni thleng
Arunachal Pradesh-ah Thawhṭanni khan hri kai thar 304 awmin, ni khata Covid-19 hri kai tam ber ni a ni. Hri kai hmuh chhuah tawh hi mi 22,106 an awm tawh.

Hemi ni vek hian hri vangin mi pali an thih belh leh a, hripui vanga thi hi mi 85 an awm tawh bawk. Hri kai thar an pun belh zel avangin Thawhṭanni aṭang khan Capital Complex Region-ah ni 14 chhung atan curfew puan a ni.

State immunisation officer Dr Dimong Padung chuan mi 3,10,761 hnenah Covid vaccine pek a ni tawh tih sawiin, an zingah hian kum 18-44 inkar mi 3,674 an tel.