Tripura sorkarin zirlaite tan Education Channel a siam

Tripura sorkarin an state zirlaite tana 24x7 education channel, 'Vande Tripura' a siam chu Thawhṭanni khan chief minister Biplab Kumar Deb chuan a tlangzarh.

Chief Minister chuan hripui leng vangin school khar ni mah se zirlaiten an zirlaite an zir chhunzawm zel theihna atan he channel hi sorkarin a siam tih a sawi a, NCERT syllabus chu he channel kaltlangin zirtir an ni dawn a ni, a ti.

Deb chuan, "Zirna hi kan ngaih pawimawh a, kum thum leh a chanve liam taa sorkarna kan chan tirh aṭang khan zirna ṭha pek a nih theihna turin kawng hrang hrangin hma kan la nghal a ni. He channel hmang hian zirlai naupangte chuan an zirlai an zir chhunzawm zel thei dawn a ni," tiin a sawi.

Education minister Ratan Lal Nath pawhin thu sawiin, a department chuan elementary school zirlaite tan innovative scheme - Notun Disha (new direction) pawh an lo siam tawh thu a sawi a, mahse hri leng avangin hma an la zui thei lo tih a sawi.

Education channel siam tharah hian tun thla chhung chu recorded programme chauh pek chhuah a ni dawn a, June thla aṭang khan live session neiin, state chhunga school 4,500 ten an zawm thei dawn a ni.